ଢେଙ୍କାନାଳ(ଉଲାପ୍ର)ଢେଙ୍କାନାଳ ଜିଲ୍ଲାପାଳଙ୍କ କାର୍ଯ୍ୟାଳୟର ସଦଭାବନା ସଭାଗୃହରେ ଜିଲ୍ଲାପାଳ ଶ୍ରୀ ସରୋଜ କୁମାର ସେଠୀଙ୍କ ଅଧ୍ୟକ୍ଷତାରେ ଚଳିତ ବର୍ଷ ଢେଙ୍କାନାଳ ସହରରେ ଗଜଲକ୍ଷ୍ମୀ ପୂଜା ପାଳନ ସଂପର୍କରେ ପ୍ରସ୍ତୁତି ବୈଠକ ଅନୁଷ୍ଠିତ ହୋଇଅଛି । ସମ୍ପ୍ରତି କାରୋନା ସଂକ୍ରମଣ ଓ ସରକାରଙ୍କ କୋଭିଡ଼ – ୧୯ ନିୟମ ଅନୁପାଳନ ଓ ସତର୍କତା ଅବଲମ୍ବନ ପୂର୍ବକ ଚଳିତ ବର୍ଷ ମା ‘ ଗଜଲକ୍ଷ୍ମୀଙ୍କ ପୂଜା ନିରାଡମ୍ବର ଭାବେ ବିଦ୍ଧି ମୁତାବକ ପାଳନ କରାଯିବ । ପୂଜା ପ୍ରତିଷ୍ଠାନ ଗୁଡିକରେ ମା ‘ ଗଜଲକ୍ଷ୍ମୀଙ୍କ ମୂର୍ତ୍ତି ର ଉଚ୍ଚତା ୪ ଫୁଟ ମଧ୍ୟରେ ହେବ । ଅକ୍ଟୋବର ୧୯ ତାରିଖରୁ ଆରମ୍ଭ ହେବାକୁ ଥିବା ଏହି ପୂଜାରେ ସର୍ବାଧ୍ୟ ୭ ଜଣ ବ୍ୟକ୍ତି ଉପସ୍ଥିତ ରହିପାରିବେ । ସମସ୍ତ ଉପସ୍ଥିତ କର୍ମକର୍ତ୍ତା ମାସ୍କ ପରିଧାନ , ସାମାଜିକ ଦୂରତା ପାଳନ ସହିତ ବିଶୋଧନ ଓ ପୂଜାମଣ୍ଡପ ଆଗରେ ବାରିକେଡ଼ ନିର୍ମାଣ ପ୍ରତି ଧ୍ୟାନ ଦେବେ । ପୂଜା ପ୍ରତିଷ୍ଠାନରେ ମାଇକ ଦ୍ୱାରା କୌଣସି ପ୍ରକାର ବାଦ୍ୟ ସଂଗୀତ ଗାନ ନାହିଁ କିମ୍ବା ସାଂସ୍କୃତିକ କାର୍ଯ୍ୟକ୍ରମ ଆୟୋଜନ କରାଯିବ ନାହିଁ । ପୂଜା ପ୍ରତିଷ୍ଠାନ ଗୁଡିକରେ ସର୍ବସାଧରଣଙ୍କ ସମାବେଶ ହେବ ନାହିଁ । ଅକ୍ଟୋବର ୨୯ ତାରିଖ ଦିନ ମା ଙ୍କ ମୂର୍ତ୍ତି ବିସର୍ଜନ କରାଯିବାକୁ ସ୍ଥିର ହୋଇଛି । ଏହି ଦିନ ପୌରପାଳିକା ପକ୍ଷରୁ ନିର୍ମିତ ଅସ୍ଥାୟୀ ଜଳାଶୟରେ ମାଙ୍କ ମୃଣ୍ମୟ ମୂର୍ତ୍ତି ବିସର୍ଜନ କରାଯିବ । ଏହି ପୂଜା ସମୟରେ ପ୍ରତ୍ୟେକ ପୂଜା ପ୍ରତିଷ୍ଠାନରେ ପୋଲିସ ମୁତୟନ ସହ ଟ୍ରାଫିକ ନିୟନ୍ତ୍ରଣର ବ୍ୟବସ୍ଥା କରାଯିବ । ସହରକୁ ପରିଷ୍କାର ପରିଚ୍ଛନ , ନାଳ ନର୍ଦ୍ଦମା ସଫା , ଷ୍ଟ୍ରିଟ ଲାଇଟର ବ୍ୟବସ୍ଥା , ରାସ୍ତା ମରାମତି , ବୁଲା ଗୋରୁଗାଇଷଣ୍ଢଙ୍କୁ ରାସ୍ତାରୁ ହଟାଯିବାର ବ୍ୟବସ୍ଥା , ପୂଜା ସମୟରେ ନିରବଚ୍ଛିନ୍ନ ବିଦ୍ୟୁତ ଯୋଗାଣ କରାଯିବ ବୋଲି ବୈଠକରେ ଆଲୋଚନା ହୋଇଥିଲା । ନିରାଡମ୍ବର ଭାବେ ମା ଲକ୍ଷ୍ମୀଙ୍କର ପୂଜା ଅନୁଷ୍ଠିତ ହେବାକୁ ଥିବାରୁ ଜନସାଧାରଣଙ୍କ ଠାରୁ କୌଣସି ପ୍ରକାର ଚାନ୍ଦା ଆଦାୟ କରାଯିବ ନାହିଁ ବୋଲି ବୈଠକରେ ନିଷ୍ପତ୍ତି ହୋଇଛି । ପ୍ରସିଦ୍ଧ ଗଜଲକ୍ଷ୍ମୀ ପୂଜା ଢେଙ୍କାନାଳର ଗର୍ବ ଓ ଗୌରବ । ଢେଙ୍କାନାଳର ସଂସ୍କୃତି ଓ ପରମ୍ପରାକୁ ବଜାୟ ରଖି ଶାନ୍ତି ଶୃଙ୍ଖଳାର ସହିତ ମା’ଙ୍କ ପୂଜା ଅନୁଷ୍ଠାନ ଓ ଭସାଣି ନିମନ୍ତେ ଜିଲ୍ଲାପାଳ ସମସ୍ତଙ୍କର ସହଯୋଗ କାମନା କରିଛନ୍ତି । ଏହି ପ୍ରସ୍ତୁତି ବୈଠକରେ ଜିଲ୍ଲା ଗ୍ରାମ୍ୟ ଉନ୍ନୟନ ସଂସ୍ଥାର ପ୍ରକଳ୍ପ ନିର୍ଦ୍ଦେଶକ ଶ୍ରୀ ସାଫଲ୍ୟ ମଣ୍ଡିତ ପ୍ରଧାନ , ଭାରପ୍ରାପ୍ତ ସଦର ଉପ – ଜିଲ୍ଲାପାଳ ଶ୍ରୀ ରବି ନାରାୟଣ ତ୍ରିପାଠୀ , ମିଳିତ ବିଜାର ଲକ୍ଷ୍ମୀପୂଜା କମିଟିର ସଭାପତି ଶ୍ରୀ ବିଶ୍ଵନାଥ ବେହେରା , ସମ୍ପାଦକ ଶ୍ରୀ ପିତାମ୍ବର ସାହୁ ଏବଂ ଶ୍ରୀ ସୁଧାଶୁ କୁମାର ଦଳେଇ , ଶ୍ରୀ ରାମଚନ୍ଦ୍ର ପାତ୍ର , ଶ୍ରୀ ଗୋପାଳ ଚନ୍ଦ୍ର ପାତ୍ର , ଶ୍ରୀ ନବ କିଶୋର ଗୁରୁ ଶ୍ରୀ ଜ୍ଞାନଚାନ୍ଦ ମିଶ୍ର , ଶ୍ରୀ ରବିନାରାୟଣ ପଟ୍ଟନାୟକଙ୍କ ସମେତ ସମସ୍ତ ପୂଜା ପ୍ରତିଷ୍ଠାନର ସଭାପତି ସମ୍ପାଦକ , ବିଭିନ୍ନ ବିଭାଗୀୟ ଅଧୁକାରୀମାନେ ଯୋଗ ଦେଇ ମା ଗଜଲକ୍ଷ୍ମୀଙ୍କ ପୂଜା ପାଳନ ସମ୍ପର୍କରେ ଆଲୋଚନା କରିଛନ୍ତି । ଶେଷରେ ଅତିରିକ୍ତ ଜିଲ୍ଲାପାଳ ଶ୍ରୀ ଶଶାଙ୍କ ଶେଖର ଦାଶ ମା ଗଜଲକ୍ଷ୍ମୀଙ୍କ ପୂଜାକୁ ଶାନ୍ତି ଶୃଙ୍ଖଳା ଓ ଭାଇଚାରା ମଧ୍ୟରେ ପାଳନ କରିବାକୁ ଅନୁରୋଧ କରି ସମସ୍ତଙ୍କୁ ଧନ୍ୟବାଦ ଅର୍ପଣ କରିଥିଲେ ।