ଟ୍ରାକଟର ଓ ମୋଟର ସାଇକେଲ ମୁହାଁମୁହିଁ ଧକାରେ ମୋଟର ସାଇକେଲ ଚାଳକ ମୃତ ଘଟଣା: ୫୯ନଂ ଜାତୀୟ ରାଜପଥ ଅବରୋଧ ଓ କ୍ଷତି ପୂରଣ ଦାବି

ବାଲିଗୁଡା,(ସଞ୍ଜୟ କୁମାର ପାଣିଗ୍ରାହୀ): କନ୍ଧମାଳ ଜିଲ୍ଲା ବାଲିଗୁଡା ଉପଖଣ୍ଡ ଅନ୍ତର୍ଗତ ଦାରିଙ୍ଗବାଡ଼ି ବ୍ଳକ ସାରିଙ୍ଗିରିପି ଦେଇ ଯାଇଥିବା ୫୯ନଂ ଜାତୀୟ ରାଜପଥରେ ଟ୍ରାକଟର ଓ ମୋଟର ସାଇକେଲ ମୁହାଁମୁହିଁ ଧକା ହୋଇ ଘଟଣା ସ୍ଥଳରେ ମୋଟର ସାଇକେଲ ଚାଳକ ମୃତ। ମୃତକ ସିମନବାଡ଼ି ଗ୍ରାମର ସାରୁମା ସାହିର କମାର ନାୟକଙ୍କ ପୁଅ ରତ୍ନାକର ନାୟକ(୩୨) । ଏହି ଘଟଣାରେ ମୃତକ ପରିବାର ଓ ସ୍ଥାନୀୟ ଲୋକଙ୍କ ପକ୍ଷରୁ କ୍ଷତି ପୂରଣ ବାବଦକୁ ୫୦ହଜାର ଟଙ୍କା ଦେବାକୁ ଦାବୀ କରିବା ସହିତ ଟ୍ରାକ୍ଟର ଡ୍ରାଇଭର ଓ ମାଲିକଙ୍କୁ ଗିରଫ ଦାବୀ ନେଇ ରାସ୍ତା ଅବରୋଧ କରିଛନ୍ତି । ଏହି ଘଟଣାରେ ଦାରିଙ୍ଗବାଡ଼ି ଥାନା ଅଧିକାରୀ କୌଶିକ ମାଝୀଙ୍କ ନେତୃତ୍ୱରେ ପୋଲିସ ଫୋର୍ସ ଘଟଣା ସ୍ଥଳରେ ପହଞ୍ଚି ଲୋକଙ୍କୁ ବୁଝା ସଝା କରୁଥିଲେ ମଧ୍ୟ ଲୋକମାନେ ଦାବୀ ପୁରଣ ନହେବା ଯାଏ ଅବରୋଧ ହଟିବ ନାହିଁ ବୋଲି ଅଡ଼ିବସିଛନ୍ତି । ଫଳରେ ଗମନାଗମନ ଠପ ହୋଇ ଯାତ୍ରୀ ଓ ପର୍ଯ୍ୟଟକ ମାନେ ସମସ୍ୟାରେ ପଡ଼ିଛନ୍ତି । ସୂଚନା ମୁତାବକ କୌଣସି ବ୍ୟକ୍ତିଗତ କାମରେ ଦାରିଙ୍ଗବାଡ଼ି ଆସି ଶୁକ୍ରବାର ସନ୍ଧ୍ୟା ପ୍ରାୟ ସାଢେ ସାତ ଘଣ୍ଟା ସମୟରେ ସାରୁମା ଗ୍ରାମକୁ ମଟର ସାଇକେଲରେ ଫେରୁଥିଲେ । ସାରିଙ୍ଗିରିପି ନିକଟ ୫୯ନଂ ଜାତୀୟ ରାଜପଥରେ ଟ୍ରାକଟର ଓ ମୋଟର ସାଇକେଲ ମୁହାଁମୁହିଁ ଧକା ହୋଇ ଘଟଣା ସ୍ଥଳରେ ମୃତ ହୋଇଥିଲେ । ଖବର ପାଇ ଦାରିଙ୍ଗବାଡ଼ି ଥାନା ଅଧିକାରୀ କୌଶିକ ମାଝୀଙ୍କ ନେତୃତ୍ୱରେ ଘଟଣା ସ୍ଥଳରେ ପହଞ୍ଚି ମୃତ ଶରୀର ଓ ଟ୍ରାକଟରକୁ ଜବତ କରି ଅଧିକ ତଦନ୍ତ କରିବା ସହ ମୃତ ଶରୀରର ବ୍ୟବଛେଦ ପରେ ପରିବାରଙ୍କୁ ହସ୍ତାନ୍ତର କରିଥିଲେ । ଏହାପରେ ମୃତକ ପରିବାର ପକ୍ଷରୁ ସିମନବାଡ଼ି ଗ୍ରାମରେ ପହଞ୍ଚି କ୍ଷତି ପୁରଣ ଦାବୀକରି ରାସ୍ତା ଅବରୋଧ କରିଛନ୍ତି ।